Kæru vinir
Kæru vinir,
Það er tæpt ár síðan við sigldum Útgerðinni úr höfn án þess að vita nákvæmlega út í hvað vorum að fara.
Markmið okkar frá fyrsta degi hefur alltaf snúist um að hafa gaman af lífinu og taka öllum áskorunum sem fylgja rekstri í litlu fyrirtæki í litlu sjávarplássi á landsbyggðinni með opnum huga. Þær hafa verið margar undanfarið ár og lærdómurinn mikill.
Engar áhyggjur, við ætlum að halda ótrauð áfram og hlökkum til að segja ykkur frá nokkrum atriðum sem við höfum þegar undirbúið. Eitthvað kann samt að breytast á næstu dögum, vikum og mánuðum á meðan annað helst óbreytt. Við vitum eiginlega bara ekki ennþá hvað frekar en aðrir. Þetta er skrítið ástand og lítill rekstur á landsbyggðinni sem lagði upp með að þjónusta ferðamenn í meirihluta þarf örugglega að breyta einhverju.
Að gefnu tilefni viljum við minna á vöruúrvalið hjá okkur, gjafabréfin og margt fleira. Það verður opið í dag frá kl. 13 – 16. Falleg strá og sumarlegir blómvendir frá Þórdísi komu vestur nú í morgunsárið. Það er alltaf eitthvað að finna í hillunum, ný listasýning á veggjunum og við gerum okkar besta til að bjóða eingöngu upp á gæðavörur.
Að lokum mælum við með því að fólk reki inn nefið hjá Jenný, Bjössa, Dodda, Siggu & Óla, Ástu, Kötu, Drífu, Ingu & Gústa og öllum hinum. Fáið ykkur að borða hjá Jóni og Lilju eða pantið ykkur borð á Viðvík þegar sólin hefur hækkað á lofti.
Ástarkveðjur,
Rut og Heimir